Duke falenderuar të gjithë të ftuarit të cilët kanë konfirmuar pjesëmarrjen në këtë aktivitet, ju bëjmë me dije se do të njoftoheni në një moment të dytë për zhvillimin e këtij aktiviteti.

Inspektorati Shtetëror i Mbikëqyrjes së Tregut gjatë periudhës Nëntor 2019- Janar 2020 ka kryer inspektime në subjektet e importit dhe tregtimit me shumicë dhe pakicë të produkteve lodra. Gjatë kësaj periudhe që korrespondon dhe me pikun e importeve të kësaj kategorie produkti, në tregun shqiptar janë bllokuar me destinacion përfundimtar shkatërrimin e tyre rreth 13 000 copë lodra të ndryshme. Bllokimi i produkteve lodra nga ana e ISHMT ka ardhur pas konstatimeve :

• Substancave toksike në nivele tepër të larta të përbërësve të plastikës dhe metaleve të rënda ku përmendim, ftalatet, boronin, plumbin, etj. Testet laboratorike janë kryer në laborator të akredituar në Itali.
• Lodrat jashtë standardit të cilat nuk janë në përputhje me direktivën europiane të lodrave dhe legjislacionin shqiptar, për sa i përket testeve fizike dhe mbartin rrezik të lartë për kategorinë e fëmijëve të moshës 0 – 36 muaj. Testet laboratorike janë kryer në laborator të akredituar në Itali.
• Lodrat me mungesë të markimit CE dhe dokumentacionit përkatës nga prodhuesi i produktit ku provohet se lodra është në përputhje me standardet europiane të sigurisë dhe nuk rrezikon jetën dhe shëndetin e fëmijëve
• Lodra të raportuara nga sistemi i shkëmbimit të shpejtë të informacionit (RAPEX) i Komisionit Europian si produkte me përmbajtje të lartë të elementëve toksikë, kancerogjene, etj.
• Lodra të raportuara nga vendet e rajonit si produkte të cilat sipas testeve laboratorike rezultojnë të rrezikshme për jetën dhë shëndetin e fëmijëve

Shkatërrimi i produkteve lodra u realizua në përputhje me legjislacionin për mbikëqyrjen e tregut të produkteve joushqimore dhe legjislacionin për mbrojtjen e mjedisit. Shkatërrimi i këtyre produkteve është domosdoshmëri pasi substancat toksike, elementët alergjenë, mutagjenë dhe kancerogjenë mbartin rrezik real për jetën dhe shëndetin e fëmijëve.

Testimet laboratorike të kryera në mostrat e lodrave të marra në 34 importues, janë vënë në dispozicion të operatorëve ekonomikë brenda afateve ligjore të parashikuara në ligjin për inspektimin. ISHMT vlerëson bashkëpunimin e operatorëve ekonomik në marrjen e masave të nevojshme për heqjen nga tregu dhe shkatërrimin e këtyre produkteve të rrezikshme. Gjatë këtij procesi nuk ka patur në asnjë rast ankim administrativ nga ana e subjekteve, ndaj të cilave është marrë masa e bllokimit dhe shkattërrimit të produkteve lodra nga ISHMT.

ISHMT u bën thirrje të gjithë subjekteve që operojnë në tregun e importit dhe tregtimit të produkteve lodra që të vendosin në tregun vendas produkte të cilat janë në përputhje me legjislacionin shqiptar, i cili është tërësisht i transpozuar dhe në përputhje me standardet europiane për prodhimin, importin dhe tregtimin e produkteve lodra. Inspektimet në tregun e importit dhe tregtimit të produkteve lodra do të vijojnë në kufi në bashkëpunim me autoritetet doganore, si edhe në treg për të vlerësuar zbatimin e kërkesave ligjore nga ana e operatorëve ekonomik.   

Me datë 07/02/2020, në ambientet e Ministrisë së Financave dhe Ekonomisë, Inspektorati Shtetëror i Mbikëqyrjes së Tregut, organizoi Analizën e Punës për vitin 2019. Inspektori i Përgjithshëm, Z. Shkëlqim Hajdari dhe përfaqësues të Inspektoratit Qendror morrën pjesë në këtë takim ku u reflektuan rezultatet e punës për vitin 2019. Z. Hajdari vlerësoi punën e kryer nga ISHMT, dhe theksoi rëndësinë e procesit të inspektimit ligjor, transparent dhe profesional nëpërmjet përdorimit të sistemit online e-inspektimi.

Kryeinspektor i ISHMT, Z. Lavdrim Sahitaj prezantoi punën e institucionit në të cilën u evidentuan si arritjet po ashtu dhe problematikat e hasura në terren gjatë vitit 2019. Në fjalën e mbajtur prej tij Z. Sahitaj pasqyroi nevojën për përmirësimin e legjilsacionit në disa nga fushat e inspektimit të ISHMT, thellimin e bashkëpunimit me institucionet bashkëpunuese dhe rritjen e shkallës së komunikimit me bizneset, konsumatorët dhe institucionet shtetërore të përfshira në këto procese. ISHMT ka nisur zbatimin e strategjisë së tij të komunikimit me qëllim uljen e produkteve në konformitetet në tregun vendas, si një nga objektivat kryesor të tij për vitin 2020.

Takimi mbi analizën e punës për vitin 2019, u konkludua me sfidat për vitin 2020 ku fokusi do të jetë rritja e shkallës së profesionalizmit të stafit për zbatimin në mënyrë rigoroze të detyrimeve ligjore që derivojnë nga legjislacioni në fuqi.

Ashensorët, inspektimet e kryera nga ISHMT, ndryshimet në kuadrin ligjor dhe detyrimet e ndërtuesve në lidhje me garantimin e sigurisë dhe plotësimin e kërkesave ligjore.

Gjatë takimit të zhvilluar më datë 30.01.2020, ora 9:30, në Hotel Tirana International me ndërtuesit u diskutua në lidhje me detyrimet që lindin për ta në lidhje me ashensorët e rinj dhe ata në përdorim, në zbatim të legjislacionit në fuqi.

Hapja e takimit, u krye nga z. Julian Llupo, Drejtor i Drejtorisë së Sigurisë së Produkteve pranë ISHMT, si institucioni përgjegjës për garantimin e sigurisë së ashensorëve dhe regjistrimin e tyre në regjistrin kombëtar.  Znj. Belinda Ikonomi – Zv. Ministër, Ministria e Financave dhe Ekonomisë, rikonfirmoi mbështetjen dhe rolin e Ministrisë së Financave dhe Ekonomisë në procesin e ndërmarr nga ISHMT mbi sigurinë e ashensorëve.

Kryeinspektori i ISHMT, Z. Lavdrim Sahitaj mori fjalën dhe kërkoi mbështetje nga ndërtuesit në lidhje me detyrimet e tyre. Z. Sahitaj diskutoi rreth procesit të regjistrimit të ashensorëve, dhe inspektimeve të kryera nga ISHMT mbi sigurinë e ashensorëve.

Së fundmi, u diskutua nga Z. Llupo mbi rolin e Inspektoratit Shtetëror të Mbikëqyrjes së Tregut në lidhje me sigurinë dhe plotësimin e kërkesave ligjore për komponentët e sigurisë, ashensorët e rinj (instaluar që prej datës 1.1.2020) dhe ashensorët në përdorim (instaluar deri në datën 31.12.2019). Gjithashtu u theksuan detyrimet ligjore të ligjit Nr. 10489, datë 15.12.2011 “Për tregtimin dhe mbikëqyrjen e tregut të produkteve joushqimore”, mbi kërkesat që lindin për ndërtuesit si persona përgjegjës për ashensorët në ndërtesat në bashkëpronësi deri në 5 vjet nga regjistrimi i bashkëpronësisë në regjistrin e pasurive të paluajtshme.

Duke qënë se është duke u plotësuar regjistri i ashnesorëve nga ISHMT, u sqarua mbi detyrimin e regjistrimit, dhe ekzaminimin e plotë fillestar nga një organ i miratuar, vendosjen e markimit CE për ashensorët e rinj dhe dokumentacionit teknik të nevojshëm. Takimi u përmbyll me diskutime dhe shkëmbimin e eksperiencave të ndërtuesve mbi etapat e procesit të plotësimit të kërkesave ligjore.

ISHMT merr pjesë në takimin 2 ditor me temë “Exploratory Talks Meeting on Market Surveillance” organizuar nga CEFTA (Central Europe Free Trading Agreement). Në këtë mbledhje u diskutua mes përfaqësuesve të Ballkanit Perëndimor WB6 dhe Moldavisë për situatën aktuale të tregut dhe kuadrin ligjor. Tema e diskutimit ishte mbi direktivat në fushën e Sigurisë së produkteve joushqimore të harmonizuara sipas acquis, për të konkluduar më tej në një draft me kërkesa dhe propozime të përbashkëta. Ky draft i përpiluar do t’i paraqitet CEFTA-s për -Suportin e vendeve të Ballkanit Perëndimor më ngritjen e një sistemi të shpejtë të shkëmbimit të informacionit si dhe aksesin e raport analizave të produkteve të rrezikshme të sistemit RAPEX. Nga ana e ISHMT pati kontribut aktiv dhe propozime konkrete të cilat u morën në konsideratë për t’ju paraqitur CEFTA-s nëpërmjet një kërkesë të përbashkët nga Vendet e Ballkanit Perëndimor.